طبعا انتشار ظاهرة الدروس الخصوصية واضح لكل مصرى وطبعا بياثر على دخل ومصروف كل أسرة مصرية وفى اقتراح مختصر لحل مشكلة الدروس الخصوصية وهو بالطبع اقتراح قابل للتعديل أو الإضافة أو حتى الإلغاء واهم النقاط مايلى :
أولاً: دور الأزهر
– سيقوم الأزهر بعمل حوافز تشجيعية للمعلمين أو بمعنى أدق سيكون لهم نسبة معينة سيقوم بتحديدها الأزهر ولابد أنها تكون نسبة مجزية وستكون هى نسبة على حسب درجات الطالب .
كيفية منح النسبة التحفيزية للمدرس
– على سبيل المثال المدرس سيقوم بالعمل فى 3 فصول كل فصل فيه 50 طالب بعدد اجمالى 150 طالب
عدد الطلاب الحاصلين على 95 وأكثر داخل فصول المدرس يكون مقابل كل طالب ولنفرض شهر حافز من اجمالى راتبه الاساسى الشهرى
عدد الطلاب الحاصلين على مجموع اقل من 95 % الى85 % سيكون الحافز نص شهر من اجمالى الراتب الاساسى
عدد الطلاب الحاصلين على اقل من 85 % الى 65% سيكون المقابل ربع شهر من راتبه الاساسى
أما اقل من 65% بدون أى مقابل.
الفوائد التى ستعود على المدرس :
أولا: النظام ده سيجعل المدرس يموت نفسه فى الفصل لأنه كل لما الطلبه ستحقق درجات كبيرة هو كمان سيكون العائد فى نهاية السنة كبير
مثال لو فرضا المدرس راتبه الاساسى 300 جنيه وحصل 40 طالب من اجمالى فصوله على مجموع اكبر من 95% سيأخذ فى نهاية السنة : 12000 جنيه
وحصل عدد 60 على اقل من 95% وحتى 85% سيكون المقابل هو : نص الاساسى يعنى 150 جنيه فى 60 طالب 9000 جنيه
وحصل 30 طالب على اقل من 85% وحتى 65 يعنى ربع الاساسى فى عدد الطلاب سيكون الاجمالى 2250
كده سيصبح اجمالى الحافز السنوى للمدرس هو : 12000+ 9000+ 2250 = 23250
بمعنى أن متوسط دخل المدرس سيكون تقريباً 2000 مع راتبه الشهرى ولنفرض 1000 وبكده سيصبح دخله الشهرى تقريباً 3000 جنيه قابلة للزيادة
مصادر التمويل :
سنقوم بعمل حصر احصائى لعدد المعاهد فى سوهاج وبتطبيق رسوم موحدة لجميع المعاهد على حسب تكلفة الطالب طبقا لمعاير جودة سيقوم بوضعها جهاز تطوير التعليم ويكون بيضم نخبة خبراء التعليم فى الأزهر
الفوائد التى ستعود على الأسرة المصرية :
– اختفاء ظاهرة الدروس الخصوصية تماما لان أكيد المدرس مش هيشرح لطالب عارف انه مش عنده فى نفس فصوله وإلا هيبقى بيساعد مدرس تأنى انه يرفع مستوى الطلبه اللى عنده و هو مش هيستفيد حاجة ولا حتى ولى الأمر هيقبل بكده
– ولى الأمر سيكون صاحب القرار لانه لو مدرس الفصل حتى حاول يضغط على ابنه علشان الدرس الخصوصى ورفض وده هيبقى يتطلب دور وتوعية لأولياء الأمور المدرس مش هيقدر يقصر فى الفصل لأنه فى الحالة دى مش هياخد غير مرتبه وأما باقى المدرسين اللى بيطبقوا المشروع ده هيستفيدوا من الحوافز السنوية
الفوائد العامة للأزهر :
أولا : الإنفاق على الدروس الخصوصية هينخفض كتير جدا وبالتالى هيتحول الإنفاق ده لبنود تانية فى ميزانية الأزهر وممكن نحول الإنفاق ده لأكتر من بند مفيد للأزهر
ثانيا : الارتقاء بمستوى الطلبة وزيادة مبدأ تكافؤ الفرص.
ده طبعا اقتراح بسيط ممكن زى ما قولنا فى الأول انه يتغير أو نضيف إليه أو حتى نلغيه لكن هو مجرد وجهة نظر أملا فى فتح مجال لأفكار جديدة ومفيدة والأزهر فيه من العقول والخبرات والإمكانيات اللى يقدر يصنع أزهرى فعلا متطور وقوى ونهضة الأزهر التى سيصنعها أبناؤه إن شاء الله
ملاحظة أخيرة ::: المشروع ده سينجح إن شاء الله لأن الأزهر قام بمايلى :
– إعادة النظر فى المناهج الدراسية بصفة عامة
– تطوير المدرس وتأهيله فعليا بما يواكب العصر الحديث
– الاختبارات المتوالية للمدرس للوقوف على مستواه الفعلى ومدى تمكنه فى تخصصه
– تجريم الدروس الخصوصية
أخيرا ده اقتراح متواضع وأكيد فضيلتكم ممكن تضيفوا وتتناقشوا فيه للوصول إلى فكرة متكاملة لعل وعسى يطبق هذا النظام .
مع تمنياتي بدوام التقدم والتفوق والازدهار لأزهرنا الحبيب …. شكرا
